असफल गृहमन्त्रीलाई कति जोगाउने ?

राजनीति समाचार

नेपाल कम्युनिस्ट पार्टी (नेकपा) लाई पाँच वर्ष शासन सत्ता सञ्चालन गर्न भनेर नै स्पष्ट बहुमत दिएका थिए (कतिपयले दुई तिहाइ बहुमत भनेका छन्, वास्तवमा त्यो होइन, स्पष्ट बहुमत मात्र हो) । तर, उनीहरुले यहि अवधि पनि पूरा गर्न नसक्दा सत्तारुढ दल नेकपा अहिले छिन्नभिन्न भएको छ । वास्तवमा नेकपा छिन्नभिन्न हुनुको पछाडि खास ठूलो कारण देखिँदैन, नेकपाका कतिपय नेताहरु जब गुटवादमा लागे, तब पार्टीले सरकार सञ्चालन गर्न नसकेको हो । जब नेता गुटमा लाग्छन्, तब पार्टीले जनताको पक्षमा वकालत गर्न सक्दैन भन्ने भनाइ यहाँ सत्य सावित भएको छ । अहिले गुटकै कारण नेकपामा अध्यक्ष तथा प्रधानमन्त्री केपी ओली बद्नाम भइरहेका छन् । उनी सुरुदेखि नै गुटमा रमाउने नेता थिए ।
उनी जेलमुक्त भएदेखि नै गुटको खेतीमा ध्यान दिएकाले नै अहिले उनले गल्ती नै गरेको भए पनि उनलाई समर्थन गर्नेको लहरले गर्दा उनमा एक किसिमको दम्भ देखिएको छ । यो दम्भ ठीक होला या नहोला, यो विषय पछि टुंगो लाग्ला तर अहिले भएको संसद विघटनको काम साँच्चिकै गलत छ । तर, उनको गुटले उनको हरेक कदमलाई ठीक मात्रै मान्ने होइनन्, उनलाई देवत्वकरण गर्दा उनले संविधानलाई पनि कुल्चने हिम्मत गरेका हुन् । अहिले केही न केही स्वार्थ बोकेका व्यक्तिहरुले उनलाई बोकिरहेका छन् । यहि लहरमा गृहमन्त्री रामबहादुर थापा लागेका छन् । गृहमन्त्री पदका कारण मात्र नभएर ओली गुटको दोस्रो वरीयतामा पर्ने आसाले उनले माउ अध्यक्ष पुष्पकमल दाहाललाई त्यागेर ओली गुटमा पुगेका छन् । उनी आफ्नो गुटमा आएपछि ओलीले उनलाई यत्तिसम्म पनि बोकिरहेका छन् कि उनी अब काम नै नलाग्ने हुँदा उनीमाथि कारबाही हुँदैन । गृहमन्त्री भएपछि जनताको जीउ, धनको सुरक्षामा ध्यान दिनुपर्ने हुन्छ तर अहिले दिनदहाडै बलात्कार, चोरी, डकैती, ज्यान मार्ने काम भइरहँदा पनि उनले न त नियन्त्रण गर्न सकेका छन् न त घटनापछि अपराधी पत्ता लगाउन सकेका छन् । उनी केवल मूर्तिका रुपमा मात्र गृहमन्त्रीको कुर्सीमा विराजमा छन् ।
थापाजतिको असफल गृहमन्त्री नेपालमा अहिलेसम्म देखिएका छैनन् । यत्ति मात्र होइन, बलात्कारपछि हत्याजस्तो मानव इतिहासकै सबैभन्दा ठूलो अपराध भइरहँदा पनि उनले नैतिकताको आधारमा राजीनामा दिँदैनन् । आफ्नो जिम्मेवारी पूरा नगर्ने गृहमन्त्री थापालाई प्रधानमन्त्री ओलीले बोक्नु भनेको ओलीका लागि पनि सबैभन्दा ठूलो भूल हुने देखिन्छ । गृहमन्त्री थापाले कञ्चनपुर घटनादेखि नै आफ्नो साख गुमाएका हुन् । सिंगो प्रहरी प्रशासन मात्र नभएर गृहमन्त्रालय नै लाग्दा पनि कञ्चनपुरको घटनामा संलग्नलाई पक्राउ गर्न नसकेपछि सरकारमाथि नै धेरै प्रश्नहरू उठेका थिए, जुन अहिलेसम्म अनुत्तरित छन् । प्रहरी प्रशासनको यत्तिको कमजोरीलाई प्रहरी इतिहासमा नै धब्बा हुने भएको छ । आफ्नो काम देखाउनका लागि प्रहरीले मानसिक सन्तुलन गुमाएका व्यक्तिलाई दोष दिएको थियो । ती मानसिक सन्तुलन गुमाएका व्यक्तिलाई घटनाको जिम्मेवारी लिन लगाउन ती मानसिक सन्तुलन गुमाएका व्यक्तिको मुखमा ‘दिसाको किरा’ ल्याएर कोच्ने प्रहरीमाथि नैतिकताको प्रश्न उठाउन मिल्ने भएको छ । काम देखाउनका लागि यस्तो गम्भीर अपराधमा प्रहरी संलग्न हुनुले प्रहरी प्रशासनमाथि अनेकौँ प्रश्नहरू उठाउन मिल्ने भएको छ । यसबेला पनि गृहमन्त्री थापा केवल बायाँ किनारामा साक्षी सदर मात्र भएर बसेका छन् ।
कञ्चनपुर घटनामा भएको प्रहरीको कमजोरीलाई अहिले पनि सरकारले दोहो¥याइरहेको छ । कञ्चनपुर घटनामा प्रहरी असफल भएपछि अपराधीहरु अहिले बैतडी पुगेका छन् । बैतडीकी एक किशोरीलाई कञ्चनपुर घटनाजस्तै गरी बलात्कार र हत्या गरियो । स्वयं प्रधानमन्त्रीले अपराधीलाई हत्यारालाई पानीमुनि गए पनि नछाड्ने भनेर सार्वजनिक रूपमा भनेका छन् । तर, काम भने देखिएको छैन । भाषण र काममा फरकपन आएको छ । बैतडी घटना भएको यत्ति धेरै समय बित्दा पनि यसको सुइँको नपाउने गृहमन्त्रीमाथि राज्यले केही न केही स्पष्टीकरण लिने कि नलिने ? प्रधानमन्त्री भाषण गर्दै जाने, तर काम केही नगर्ने हो भने यसले जनताको मन जित्न गाह्रै हुनसक्छ । बैतडी घटनामा संलग्न जो कोहीलाई भए पनि कारबाहीको दायरामा ल्याउने प्रतिबद्धता व्यक्त गर्नु ठूलो कुरा होइन, सरकारले भाषण होइन, काम गरेर देखाउनु पर्छ । अपराधीहरूले दिनदहाडै यस्ता अपराध गरिराख्दा सरकार भने सडकमा शक्ति प्रदर्शन गरेर बसिरहेको छ । यत्ति मात्र होइन, गृहमन्त्रीले नेताहरूलाई चिडियाखानमा थुन्ने भाषण दिइरहँदा लाज मान्नुपने हो । नेतालाई चिडियाखानामा थुन्नेभन्दा जनताको सुरक्षा दिने पहिलो प्राथमिकताको कुरा हो । गृहमन्त्रीले आफ्नो विरोधीलाई चिडियाखानामा राखून् या रातोकार्पेट बिच्छ्याएर स्वागत गरुन्, यो उनको व्यक्तिगत कुरा हो । तर, जनताको सुरक्षामा कुनै कसर बाँकी राखिनु हुँदैन ।
निर्मला हत्याकाण्डको दोषी पत्ता लगाउन नसक्ने प्रहरीका लागि बैतडीकी भागरथी हत्याकाण्ड निक्कै भारी भएको छ । घटना भएको यत्तिका दिन भइसक्दा पनि अपराधीको नजिकसम्म नपुग्नु नेपाल प्रहरीका लागि लज्जस्पद कुरा हो । प्रधानमन्त्रीले गृहमन्त्रीको कमजोरी लुकाउँदा यसले पार्ने असर निर्वाचनमा देखिने नै छ । बैतडी काण्डका दोषीलाई पानीमुनि मात्र नभएर विश्वका कुनै भागमा पुगे पनि नछाडिने प्रधानमन्त्रीले वक्तव्य दिनुले गृहमन्त्रीको क्षमतामाथि प्रश्न उठ्छ । आफूलाई समर्थन गरेको भरमा प्रधानमन्त्रीले गृहमन्त्रीको कमजोरी ढाकछोप गरिरहेका छन् । तर, यसको परिणामले प्रधानमन्त्री नै पछारिने संकेत देखिएको छ । कञ्चनपुर घटनामा अपराधी पत्ता लगाउन १२ वर्ष लाग्ने भनेपछि प्रधानमन्त्री स्वयंले बैतडी घटनाका बारेमा बोल्न बाध्य भएका हुन् । यसबारे गृहमन्त्रीले बोल्ने नैतिकता गुमाइसकेका छन् । विकसित मुलुकभन्दा नेपालमा बलात्कारको घटना कम भएकाले चिन्ता गर्नु नपर्ने बताएर नेपाली जनताको अपमान गरेकाले उनीमाथि नेपालीले विश्वास गर्न छाडेका छन् ।
कञ्चनपुरकी बालिकाको बलात्कार गरेर हत्या गर्नेलाई पक्राउ गर्न बाह्रवर्ष लाग्ने भनेर प्रधानमन्त्री र गृहमन्त्रीले सार्वजनिक कार्यक्रममा नै भनेका छन् । उनीहरूले बलात्कारी खोज्नुभन्दा पनि कतिपय अपराधीहरूलाई पक्राउ गर्न बाह्रवर्ष लाग्ने भनेर उम्किरहेका छन् । अहिले उनीहरू देश र जनताको सुरक्षाभन्दा पनि राज्यको ढुकुटीबाट चुनावको भाषण छाँट्दै हिँडेका छन् । देश र जनताको काम गरेर जनताको मन जित्नुभन्दा पनि आफूविरुद्ध उभिएकाले उनीहरूलाई चिडियाखानामा हाल्ने धम्की दिनु कतिसम्मको जायज हा । जनताले छाक काटेर तिरेको करबाट तलब भत्ता खाएर अनेकौँ भाषण दिने छुट उनीहरूलाई भएको देखिएको छ । नेताहरू किचलोमा लागेर हिँडिरहँदा छोरीहरूको इज्जतमाथि दिउँसै धावा बोल्ने काम भइरहेको छ । महिलाहरू असुरक्षित भएतिर सरकराको ध्यान छैन । केही भइहाल्यो भने अपराधी पत्ता लाग्न बाह्र वर्ष लाग्छ भनेर भन्ने हो भने सरकार हुनु र नहुनुमा के फरक भयो र ?
बैतडीकी किशोरीको बलात्कारपछि हत्या भएको पुष्टि भएको छ । बैतडीको दोगडाकेदार गाउँपालिकास्थित जंगलमा विभत्स अवस्थामा भेटीएकी किशोरीको बलात्कारपछि हत्या भएको पुष्टि हुनु राज्यको लागि सबैभन्दा ठूलो बेइज्जत हो । पोस्टमार्टम रिपोर्टमा किशोरीको बलात्कारपछि हत्या भएको देखिएको प्रहरीले जानकारी दिएको छ । प्रहरीले दोषी खोज्न नसकेपछि यसले बलात्कार एकल थियो की सामूहिक थियो भन्नेबारे टुंगो लगाउनेतिर अघि बढेको देखिन्छ । तर, यत्ति पत्ता लगाएर बस्ने हो भने प्रहरी प्रशासनको काम के ? बलात्कारपछि घाँटी थिचेर ती किशोरीको हत्या भएकाले अब प्रहरीले यसलाई पत्ता लगाउन नसक्ने हो भने अपराधीहरूको मनोबल बढ्ने छ । जस्ले गर्दा छोरीहरू घरबाहिर निस्कन नै डरलाग्दो अवस्था हुनेछ ।
बैतडीको घटनामा संलग्नलाई पक्राउ गर्न नसक्ने हो भने अब किशोरीहरू विद्यालय जानुबाट वञ्चित हुनुपर्ने भएको छ । महिलाहरू एक्लै हिँड्नै नहुने भयो भने गृह प्रशासन सञ्चालन गर्ने सञ्चालकहरूले के का लागि राज्यबाट सुविधा लिइरहेका छन् । प्रहरीले अपराधी पत्ता लगाउन सकेन भने के प्रहरीहरूलाई जनताले ज्वाइँ पालेसरह पाल्ने हो त ? ती किशोरीको बुबाको डेढ महिनाअघि मात्र मृत्यु भएको थियो । उनको अभिभावक नहुनेबित्तिकै उनीमाथि बलात्कार गरेर हत्या हुने हो भने गृहमन्त्रीले प्रशासन चलाउन नसकेको आधारमा राजीनामा दिने कि नदिने ? जनताको सुरक्षामा ध्यान दिनु नसक्ने गृहमन्त्रीले आफ्ना विरोधीलाई चिडियाखानामा थुन्ने धम्की दिनु कतिसम्म जायज छ ? केही भइहाल्यो भने विकसित मुलुकमा समेत धेरै बलात्कारका घटनाहरू हुने भएकाले नेपालमा हुने बलात्कार केही होइन भनेर कानमा तेल हालेर बस्ने गृहमन्त्रीको बखान कुन शब्दले गर्ने ? बलात्कारलाई सामान्य रूपमा अथ्र्याउने गृहमन्त्रीमाथि जनताले कारबाही गर्ने बेला भएको छ । अन्यथा बलात्कारीले १२ वर्षसम्म अनेकौँको बलात्कार गरिरहने छन् ।

Leave a Reply

Your email address will not be published.