काठमाडौं । एमाले निकट कर्मचारी संगठन यतिबेला कुन चरिको नामजस्तै बन्न पुगेको छ । अध्यक्षको जिम्मेवारी सम्हालेकी भवानी न्यौपाने दाहालले जेनजी पुस्ताको आन्दोलनबाट ध्वस्त भएको भवन पुनःनिर्माण गर्न कुनै पहल नगरेको, कर्मचारी सरुवा, बढुवामा पनि हस्तक्षेप गरेको, संगठनलाई मजबुद बनाउन नसकेको र संघीय निजामती ऐनको बारेमा कुनै पहल नगरेको आरोप खेपिरहेकी छिन् ।
अर्कोतर्फ जेनजी पुस्ताबाट बनेको सरकारले कर्मचारीमाथि भेदभावपूर्ण व्यवहार गरिरहँदा पनि त्यसप्रति कुनै चासो नदेखाएको आरोप छ । कर्मचारी संगठन विगतभन्दा हाल निकम्मा बन्दै गएकाले संगठन गलत व्यक्तिको हातमा परेको गुनासो पूर्वपदाधिकारीहरुले गर्न थालेका छन् । कर्मचारी संगठनमा महिला नेतृत्व हुँदा पनि महिला कर्मचारीमाथि भेदभावपूर्ण व्यवहार गरेको गुनासो त्यत्तिकै छ । भवानी नेतृत्वको कार्यसमितिले मिटिङ बसिरहने तर संगठनको काममा कुनै ध्यान नदिने गरेको आरोप पनि लागिरहेको छ । जेनजी आन्दोलनले संगठनको भवन ध्वस्त बनाइदिएपछि उनको होसहवास उडेको बताइन्छ ।
संगठनका अन्य पदाधिकारीहरुले पनि माखो मारेका छैनन् । कार्यसमितिका पदाधिकारीहरु एकले अर्कोलाई दोष लगाएर पन्छिने काम गर्न थालेका छन् । कतिपय कर्मचारीहरु त विगत लामो समयदेखि एमालेको आडमा संघीय मन्त्रालयमा डेरा जमाइरहेका छन् । कर्मचारी संगठनभित्रका उमेश पराजुली थरका नासु संघीय मन्त्रालयमा विगत ५÷७ वर्षदेखि स्थानीय, प्रदेश र संघका कर्मचारीहरुको तीनपुस्ते सार्वजनिक गर्ने गर्दै आएका छन् । त्यति मात्रै गरेका छैनन् कुन मितिमा कुन कर्मचारी कहाँ थियो, ऊ कहाँ कहाँ बस्यो र कति आम्दानी गरो भनेर केही मिडियामार्फत् समाचार सार्वजनिक गर्ने गर्दै आएका छन् । कतिपय मिडियाले पराजुलीविरुद्ध समाचार प्रकाशित गरिरहेका छन् ।
उनीविरुद्ध समाचार प्रकाशित हुँदा ‘त्यस्ता झारे पत्रकारले समाचार लेखेर कसैले केही गर्न सक्दैन’ भन्ने गर्दै आएका छन् । पराजुली केही पत्रकार र केही कर्मचारीहरुलाई हातमा लिएर अन्य दलनिकट कर्मचारी र मन्त्रीको समाचार लेखाउन प्रयोग हुने गर्दछन् । संघीय मन्त्रालयमा लामो समयदेखि जरा गाडेर बस्ने कर्मचारीहरु पराजुलीसँगै अन्य दलनिकट पनि छन् । संघीय मन्त्रालयमा उपसचिव भएर लामो समयसम्म बसेकी मिरा आचार्य अहिले सहसचिवमा बढुवा हुँदा पनि सोही मन्त्रालयमै बस्न सफल भएकी छिन् ।
सहसचिव पार्वती शर्मा र निता पोखरेललाई तत्कालीन संघीय मन्त्री भगवती न्यौपानेले अन्यत्रबाट ल्याएकी थिइन् । आज तीनै सहसचिवहरुको संघीय मन्त्रालयमा कर्मचारी सरुवा, बढुवामा खेलोफड्को चलिरहेको छ । राजनीतिक दलका नेताहरुले तीनै सहसचिवहरुलाई प्रयोग गरेर विभिन्न समस्या देखाई उनीहरुले चाहेको ठाउँमा सरुवा गर्न लगाउने गर्दै आएका थिए । आजकाल त्यो सोर्सफोर्स संघीय मन्त्रालयमा चल्दैन । सचिव र सहसचिवहरुको हालीमुहाली चल्ने गरेको छ ।
जेनजी सरकार बनेपछि दलका नेताहरुको सोर्सफोर्सको सरुवा बढुवा लत्याउँदै आफूखुसी मोलमोलाई गरी कर्मचारी सरुवा गर्ने गरेको स्रोतले उल्लेख गरेको छ । संघीय मामिला तथा सामान्य प्रशासन मन्त्रालय रामेश्वर खनालले सम्हालिइरहँदा विकृति र विसंगति झन् बड्दै गएको छ ।
मन्त्री खनाल हप्तामा एक÷दुई पटक जाने र तीनै सहसचिवको इसारामा चल्ने कारणले गर्दा कर्मचारी सरुवा, बढुवामा बेथितिको चाङ्ग बढेर गएको छ । उता, कर्मचारी संगठनका नेताहरुको भनसुन पनि चल्न छाडेको छ । एक त राजनीतिक दलहरु छिन्नभिन्न भएका छन्, अर्कोतिर कर्मचारंी संगठन पनि छिन्नभिन्न भएको कारण संघीय मन्त्रालयमा सधैं गाईजात्र हुने गरेको छ । मन्त्री खनाललाई अर्थमन्त्रालय सम्हाल्दैमा ठिक्क छ ।
