राजश्व अनुसन्धान विभाग,नवराज अधिकारी, सुचना अधिकारी
पछिल्लो समय राजस्व छली एवम् चुहावटका घटना बढेको आकलन गर्दै त्यस्ता गतिविधिलाई रोक्न राजस्व अनुसन्धान विभागले सक्रियता देखाएको छ । राज्यलाई ढाँटेर अकुत सम्पत्ती आर्जन गर्ने जो कोही विरुद्ध पनि विभागले निर्दयी बनेर कार्वाही गर्ने छ । भन्सारतर्फ धेरै राजस्व चुहावट भएको आकलनमा मुख्य नाकाहरुमा विभागले निगरानी बढाएको छ ।
विभागले निगरानी बढाएपछि भन्सारतर्फको राजस्वमा समेत सुधार आउन थालेको छ । नेपालबाट वस्तु आयातनिर्यात हुने विराटनगर भन्सार नाका, वीरगन्ज भन्सार नाका, सुनौली भन्सार नाका, मेची भन्सार नाका, त्रिभुवन विमानस्थल भन्सारमा विभागले निगरानी बढाएको छ ।
सूचनाका आधारमा शंकास्पद व्यापारी र वस्तु नियन्त्रणमा समेत लिने क्रम बढाएको छ । आन्तरिक तथा भन्सारतर्फ जहाँ जसरी राजस्व चहावट भए पनि यस निकायले निगरानी राख्छ । तत्काल कारबाही गर्न सक्नेदेखि अदालतमा मुद्दा बुझाउन सक्नेसम्मको अधिकार यस निकायलाई छ । चुहावट रोकेर नै सरकारको कोष घाटापूर्ति गरिदिने हाम्रो प्रमुख दायित्त हो ।
राजश्व मार्न पल्किएका व्यापारी,उद्यमीदेखि विचौलियाहरु एक पछाडि अर्काे गरी राजश्व विभागको फन्दामा पर्न थालेका छन् । पछिल्लो समयमा राजस्व चुहावट र छली गर्नेले विभिन्न उपाय अपनाउँदै आएका छन् । राजस्व चुहावट गर्नेले न्यून विजकीकरण गर्ने, झुटा अनुमतिपत्रबाट निकासी पैठारी गर्ने, वस्तुको गलत घोषणा गर्ने, ठाडो तस्करी गरी राजस्व चुहावट तथा छली गर्ने गरेका छन् ।
यसैगरी राजस्व छली गर्दा अधिक जिविकरण, काजजात नक्कली बनाएर, नक्कली वस्तु आयात निर्यातबाट, करमुक्त वस्तु बजारमा बेचेर तथा बिलबिना नै बिक्री वितरण गरेर राजस्व छली हुने क्रम बढिरहेको छ ।
