जेनजी आन्दोलनपछि शुशिला कार्कीको नेतृत्वमा बनेको सरकारमा स्वास्थ्य तथा जनसंख्या मन्त्रीमा डा. सुधा शर्मा गौतम नियुक्ति भएको पनि महिनादिन हाराहारी पुग्न लागेको छ । मन्त्री गौतमले स्वास्थ्य मन्त्री बनेसँगै सेवाग्राहीबाट घुस लिने र समयमा काम गर्न नसक्ने कर्मचारीलाई कारबाही गर्ने भनीरहँदा स्वास्थ्य क्षेत्रका कर्मचारीलाई मनपरी सरुवा गरेर आतंकित बनाएकी छिन् ।
मन्त्री गौमत स्वास्थ्य क्षेत्रकै कर्मचारीबाट आएकी भए तापनि कर्मचारी तन्त्रलाई चलायमान बनाउन नसकेको आरोप लाग्न थालेको छ । स्वास्थ्य सामग्री खरिदमा पनि ध्यान नदिएको आरोप उनीमाथि छ । सरकारी अस्पतालमा पूर्ववर्ती सरकारले खरिद गरेका स्वास्थ्य सामग्रीहरु प्रयोगमा नल्याएर अलपत्र परिरहेका छन् । तर, बिरामी जाँच गर्दा सरकारी अस्पतालमा स्वास्थ्य उपकरण नभएको भन्दै निजी अस्पतालतिर पठाउने र कमिसन खाने गरिएको छ । मन्त्री गौतमले त्यतातिर ध्यान दिएकी छैनन् । चिकित्सक र कर्मचारीहरु पनि सरकारी अस्पतालमा हाजिर गरेर निजी अस्पतालमा काम गर्ने गरेका थुप्रै उदाहरण छन् ।
स्वास्थ्य क्षेत्रबाट मन्त्री बनेकी गौतमले पदभार ग्रहण गरेको महिनादिन पुग्न लाग्दासमेत स्वास्थ्य क्षेत्रमा कुनै सुधारको काम गर्न सकेकी छैनन् । उता, निजी अस्पतालहरुले सर्वसाधारण जनतालाई महंगो शुल्क लिएर लुटिरहेका छन् । सरकारी अस्पतालमा चिकित्सक र स्वास्थ्य सामग्रीको अभाव देखाएर निजी अस्पतालमा बिरामी रिफर गर्ने कर्मचारीहरु पनि त्यत्तिकै छन् ।
सरकारी अस्पतालमा छिटोछरितो ढंगले उपचार नभएपछि सर्वसाधारणहरु निजी अस्पतालमा जान वाध्य भएका छन् । यस्तो विषयमा मन्त्री गौतमको नजर पर्न सकेको छैन । सरकारी अस्पतालले राम्रो सेवा दिन नसक्दा निजी अस्पतालहरु बिरामीले भरिभराउ भएका छन् । बिरामी चाप बढेपछि निजी अस्पतालहरुले मनोमानी ढंगले शुल्क बढाउने गरेका छन् । सरकारी अस्पतालहरुले २०७६ सालको कोरोना कालमा ल्याएका अधिकांश स्वास्थ्य उपकरणहरु अहिलेसम्म प्रयोगमा नल्याएर अलपत्र परिरहेका छन् ।
प्रदेश र स्थानीय तहमा अस्पताल र स्वास्थ्य चौकी भए तापनि स्वास्थ्य उपकरण र चिकित्सकहरुको अभावले गर्दा सामान्य बिरामीहरु पनि काठमाडौं आउन वाध्य भएका छन् । काठमाडौंमा रहेका ठूला–ठूला सरकारी अस्पतालहरुलमा चिकित्सक र कर्मचारीको लापरबाहीले गर्दा कतिपयले अकालमै ज्यान गुमाउनुपरेको घटना पनि त्यत्तिकै छन् । त्यतातिर पनि मन्त्री गौतमको ध्यान गएको छैन । मन्त्री गौतम पनि पूर्ववर्ती सरकारका मन्त्रीहरुले गरेजस्तै कर्मचारी सरुवा, बढुवा गर्ने, अनावश्यक स्वास्थ्य सामग्री र औषधि खरिद गर्ने, औषधि माफियाहरुले गरेको कार्यक्रमहरुमा भाषण गर्नेलगायतका झिनामसिना विषयमा अल्झिएर दिन बिताइरहेको पाइन्छ ।
अर्कोतिर स्वास्थ्यकर्मी र कर्मचारीहरुले पनि मन्त्री गौतमलाई काम गर्ने वातावरण सिर्जना गर्न सकेका छैनन् । किन कि प्रायःजसो चिकित्सक र कर्मचारीहरु दलीय आवरणका भएको कारण पनि स्वास्थ्य मन्त्री गौतमले उनीहरुबाट सहयोग पाएकी छैनन् । हुत मन्त्री गौतम पनि कुनै न कुनै पार्टी निकट भएर स्वास्थ्य क्षेत्रमा काम गर्दै आएकी व्यक्ति हुन् । आज जेनजी पुस्ताको आन्दोलनबाट मन्त्री बन्ने अवसर प्राप्त गरेकी छिन् । जेनजी पुस्ताको आन्दोलनको आडमा मन्त्री बन्ने अवसर प्राप्त गरे तापनि स्वास्थ्य क्षेत्रलाई नयाँ ढंगबाट सुधार गर्न पहल गरेकी छैनन् ।
