काठमाडौं। नेकपा (माओवादी केन्द्र) का प्रमुख सचेतक हितराज पाण्डेले कांग्रेस प्रमुख सचेतक श्याम घिमिरेले अध्यादेशबाट सरकार चलाउने गरेको कुराप्रति असन्तुष्टि जनाएका छन् ।
सिंहदरबारमा मंगलबार बसेको कार्यव्यवस्था परामर्श समितिको बैठकपछि सञ्चारकर्मीहरुसँगको कुराकानीमा उनले यस्तो असन्तुष्टि जनाएका हुन् । उनले कांग्रेस प्रमुख सचेतक श्याम घिमिरेले अब सरकारले अध्यादेशबाट सरकार चलाउने कुरा जनता र विपक्षी दलहरुका लागि राम्रो नभएको बताएका छन् ।
सदनको सबैभन्दा ठूलो दलको प्रमुख सचेतकले अब सरकार अध्यादेशबाट नै चलाउने कुरा गर्दा यस बारे संसदमा गम्भीर ढंगले प्रश्न उठाउने उनले बताएका छन् । आफूले बैठकमा संसदमा पेश भएका विधेयकहरुलाई कानूनको रुप दिन ढिलाइ भइरहेको र यसले सरकारलाई अध्यादेश ल्याउन प्रेरित गरिरहेकाले विधेयक छिटो, छरितो रुपमा टुंग्याउनुपर्ने कुरा राख्दा भ्रम फैल्याइएको घिमिरेले बताएका छन् ।
