काठमाडौं । भारतले अपरेशन सिन्दूर अन्तर्गत गरेको कारबाहीबाट पाकिस्तान आक्रामक बनेको छ ।
पछिल्लो ३६ घण्टामा सीमाको अवस्था द्रुत गतिमा परिवर्तन भएको छ । यी परिस्थितिहरूलाई ध्यानमा राख्दै, भारतले देशभरका विमानस्थलहरूमा उच्च अलर्ट जारी गरेको छ । भारत–पाकिस्तान तनावको बीचमा, पञ्जाब, जम्मू र कश्मीर, लद्दाख, गुजरात, राजस्थान र हिमाचल प्रदेशका २४ विमानस्थलहरू नागरिक उडानहरूका लागि अस्थायी रूपमा बन्द गरिएका छन् । धेरै एयरलाइन्सहरूले ट्राभल एडभाइजरी पनि जारी गरेका छन् ।
बन्द गरिएका विमानस्थल क्षेत्रहरू भारत–पाकिस्तान सीमा नजिक छन् वा रणनीतिक रूपमा संवेदनशील छन् । पाकिस्तानले पठानकोट, जालन्धर र जैसलमेर जस्ता क्षेत्रहरूमा ड्रोन आक्रमण गरेको हुनाले, बन्दको उद्देश्य हवाई आक्रमण वा ड्रोन आक्रमणबाट सुरक्षा सुनिश्चित गर्नु रहेको भारतीय अधिकारीहरुले बताएका छन् ।यसबाहेक, नागरिक उड्डयन सुरक्षा ब्यूरोले सबै विमानस्थल र एयरलाइन्सहरूलाई सुरक्षा उपायहरू बढाउन निर्देशन दिएको छ ।
पाकिस्तानले बिहीबार राति भारतमा ड्रोन आक्रमणको प्रयास गरेको छ । तर भारतीय सेनाले आक्रमणको उचित जवाफ दिएको बताएको छ । यसपछि जम्मूदेखि राजस्थानसम्म ब्ल्याकआउट भएको थियो । यससँगै धर्मशालामा खेलिरहेको पञ्जाब किंग्स र दिल्ली क्यापिटल्सबीचको खेल बीचैमा रोकिएको थियो र केही समयपछि रद्द गर्ने निर्णय गरिएको थियो । यसैबीच, भारतीय वायु रक्षा बलले पठानकोट सेक्टरमा पाकिस्तानी वायुसेनाको एउटा जेट र नौशेरा सेक्टरमा दुई पाकिस्तानी ड्रोन खसालेको बताएको छ ।
