काठमाडौं । पोप फ्रान्सिसको निधन भएको छ । भ्याटिकनको कासा सान्ता मार्टास्थित आफ्नो निवासमा ८८ वर्षको उमेरमा सोमबार निधन भएको भ्याटिकन सिटीले जानकारी दिएको छ ।
क्याथोलिक ईसाई धर्मगुरु पोप फ्रान्सिस फोक्सोको संक्रमणका कारण ५ हप्तासम्म अस्पतालमा भर्ना भएका थिए । पोप फ्रान्सिस एक अर्जेन्टिनाका जेसुइट पादरी थिए जो २०१३ मा रोमन क्याथोलिक चर्चका २६६औं पोप बनेका थिए । उनी पोप बेनेडिक्ट सोह्रौंको उत्तराधिकारी निर्वाचित भए । पोप फ्रान्सिस पछिल्लो एक हजार वर्षमा पहिलो व्यक्ति थिए जो गैर–युरोपेली थिए तर क्याथोलिक धर्मको सर्वोच्च पदमा पुगे ।
पोपको जन्म १७ डिसेम्बर १९३६ मा अर्जेन्टिनाको फ्लोरेन्समा भएको थियो । पोप बन्नुअघि उनी जर्ज मारियो बर्गोग्लियोको नामले चिनिन्थे । उनी सोसाइटी अफ जीसस (जेसुइट्स) को सदस्य हुने पहिलो पोप थिए र अमेरिकाबाट आउने पहिलो पोप थिए । उनले ब्यूनस आयर्स विश्वविद्यालयबाट दर्शनशास्त्र र धर्मशास्त्रमा स्नातकोत्तर डिग्री हासिल गरेका थिए । १९९८ मा, उनी ब्यूनस आयर्सको आर्कबिशप बने र २००१ मा, पोप जोन पल द्वितीयले उनलाई कार्डिनल बनाएका थिए ।
