काठमाडौं । फिफाले तय गरेको नयाँ फर्म्याटको क्लब विश्वकपमा सहभागी क्लबहरुले तयारी शुरु गरेका छन् ।
यहि जुन १४ देखि जुलाई १३ सम्म अमेरिकामा हुने फिफा क्लब विश्वकप मा ३२ क्लबले भाग लिदैछन् । ६ कन्फेडेरेसनका ३२ क्लबलाई ८ समुहमा विभाजित गरिएको छ ।आयोजकको रुपमा अमेरिकन क्लब इन्टर मियामी रहेको छ भने एशियाबाट चार क्लब अल हिलाल, उर्वा रेड डायमण्डस, अल एन र उल्सन एचडी रहेका छन् । त्यस्तै अफ्रिकाबाट अल अहली, विडाड एसी, एसपेरेन्स डे टुनिस, मामेलोड़ी सनडाउन्स रहेका छन् । अमेरिका र क्यारेबियन क्षेत्रबाट मोन्टेरे, सीटल्स सन्डर्स एफसी, पाचुका र लस एन्जल्स एफसी रहेका छन् । दक्षिण अमेरिकी क्षेत्रबाट पाल्मेरियाज, फ्लामेन्गो, फ्लुमिनेन्स, बोटाफोगो, रिभर प्लेट, बोका जुनियर्स रहेका छन् । त्यस्तै ओसियाना क्षेत्रबाट अकल्याण्ड सिटी रहेको छ । त्यसैगरी युइएफएबाट १२ क्लब फिफा क्लब विश्वकप खेल्दै छन् । जसमा चेल्सी, रियल म्याड्रिड, म्यानचेस्टर सिटी, बायर्न म्युनिख, पिएसजी, इन्टर मिलान, पोर्टो, बेनिफिका, बोरुसिया डोर्टमण्ड, युभेन्टस, एटलेटिको म्याड्रिड र रेड बुल साल्जबर्ग रहेका छन् ।
३२ क्लबलाई ८ समुहमा विभाजन गरिएको छ । जसमा समुह ‘ए’ मा इन्टर मियामी, पाल्मेइराज, पोर्टो र अल अहली रहेका छन् भने समुह ‘बी’ मा पिएसजी, एटलेटीको म्याड्रिड, वोटाफोगो र सीटल सन्डर्स एफसी रहेका छन् । त्यस्तै समुह ‘सी’ मा बायर्न म्युनिख, अकल्याण्ड सिटी, बोका जुनियर्स र बेनिफिका रहेका छन् भने समुह ‘डी’ मा फ्लामेन्गो, एसपेरेन्स डे टुनिस, चेल्सी र लस एन्जल्स एफसी रहेका छन् । त्यसैगरी समुह ’इ’ मा रिभर प्लेट, उर्वा रेड डायमण्डस, मोंटेरे र इन्टर मिलान रहेका छन् भने समुह ‘एफ’ मा फ्लुमिनेन्स, बोरुसिया डोर्टमण्ड, उल्सान एचडी र मामेलोडी सनडाउन्स रहेका छन् । त्यसैगरी समुह ‘जी’ मा म्यानचेस्टर सिटी, वीडाड एसी, अल ऐन र युभेन्टस रहेका छन् भने समुह ‘एच’मा रियल म्याड्रिड, अल हिलाल, पचुका र रेड बुल साल्जबर्ग रहेका छन् ।
समुह चरणको खेलपछि हरेक समुहका शिर्ष दुई क्लब राउण्ड १६ मा पुग्ने छन् र त्यसपछि नकआउट चरण शुरु हुने छ । फिफा क्लब विश्वकपको फाइनल खेल जुलाई १३ मा हुने छ । फिफाले क्लब विश्वकपका लागि कुल पुरस्कार रकम एक बिलियन डलर छुट्ट्याएको छ । प्रतियोगिताको विजेताले बढीमा १२५ मिलियन पाउने फिफाले बताएको छ ।
