काठमाडौं । काठमाडौंको टेकुमा कवाड व्यवसायी र नगर प्रहरीबीच झडप भएको छ ।
आइतबार कवाडी गोदाम हटाउन पुगेको काठमाडौं महानगरपालिकाको नगर प्रहरी बललाई कवाड व्यवसायीहरुले अवरोध गर्न खोजेपछि झडप भएको हो । झडपको क्रममा दुवै पक्ष गरी पाँच जना घाइते भएका छन् । घाइते हुनेमा तीन जना कवाड व्यवसायी छन् भने दुई जना नगर प्रहरी रहेका छन् ।
नगर प्रहरीको टोली डोजर लिएर कवाडी संकलन केन्द्र भत्काउन पुगेको थियो । तर, कवाड मजदुरहरूले प्रतिवाद गर्न खोजेपछि झडप भएको महानगरले जनाएको छ । काठमाडौं महानगरको नगर प्रहरी बलले अवैध संरचना हटाउने क्रममा टेकुमा डोजर लिएर कवाडी संकलन केन्द्र भत्काउन खोज्दा कवाडी व्यवसायीले बोत्तल प्रहार गरेको र आत्म सुरक्षा गर्ने क्रममा दोहोरो झडपको स्थिति आएको महानगरले जनाएको छ ।
