काठमाडौं । भारतीय रियालिटी शो ‘डान्स इन्डिया डान्स लिल मास्टर्स’को सिजन ३ र ‘झलक दिखलाजा’ सिजन ९की विजेता तेरिया फौजा मगरले फिल्म अभिनयमा डेब्यु गर्ने भएकी छन् ।
तेरियाले सन् २०२२ को भारतीय वेब सिरिज ‘युन की यारी’ र सन् २०२३ को ‘क्याम्पस बिट्स’ जस्ता वेव सिरिजमा काम गरेकी थिइन् । जनक घर्तीमगरको लगानी रहने फिल्ममा जिएम मूभिज प्रोडक्सन र एबीएम सिने प्रोडक्सनको ब्यानरमा बन्न लागेको हो । अनिल बुढा मगरको निर्देशन रहने फिल्म ‘मितज्यू’को मुख्य भूमिकामा उनी हालै अनुबन्धित भएकी हुन् । फिल्मको अभिनेतामा दयाहाङ राई यसअघि छानिएका थिए ।
फिल्ममा दयाहाङ र तेरिया बाहेक अन्य कलाकार छिट्टै टुङ्गो लाग्ने निर्माण युनिटले जनाएको छ । फिल्मको प्रदर्शन मिति २०८२ चैत २७ गते तोकिएको छ । फिल्म महेश राईले लेखेका हुन् ।
